بروح بغسلو اياها ولسا ها بدي انام من التعب اللي انا فيه واللا حزر فزر خالي وصل , اجا خالي عنا فا انا بصير بحكي مع حالي (خالي بعرضك مش وقتك هلأ ), فا بضطر ألبس اواعي العيد ( كل عيد نفس الأواعي مشان هيك مسميهم أواعي العيد )
لإنو انا صرت كبير وأهلي ما بيشترولي أواعي .
المهم بروح وبسلم على خالي والمشكلة انو ببلط وبيستحي يقوم ,انو 10 دقايق اذا قعد ساعتين فا هاد معناها انو مستعجل ولازم يلحق يعيد على الكل, طب يا خالي يا عزيزي معك السنة كلها تيجي عنا طبعا خالي ما بيجي اللا بالعيد وشكلو بهاليوم هاد بعوض السنة كلها , المهم لما تصير فترة الظهيرة( بعد ما يروح اخوها لإمي من عنا )أبوي بياخدني معو مشان نعيد على عماتي الشريرات اللي انا ما بطيقهم, طبعا تقاليد كل بيت في العيد نفسها نفسها اللي هيي بتدخل انت عالبيت فا بيحكولك كل عام وانت بخير أو كل سنة وانت سالم والجملة الاولى اكثر شيوعا من الجملة الثانية بسبب احتلال العثمانيين لنا منذ القدم, وايضا حسب وين هو متربي.
هلا انت بعد ما ترد عليهم بجملة وانت بالف خير يا رب , وبتروح تقعد, هلا اذا البيت اللي دخلتو ما في عندهم حدا كبير يعني كلهم ولاد صغار , فا ببشرك انو انت المرشح الأول لتقوم بعملية الخدمة والضيافة وتقديم المقبلات , المقبلات (معمول , قهوة سادة , شوكولاتة ) , وبلا مقابل طبعا , حتى فش الك عيدية .
في عنا وحدة من قرايبنا يا لطيف ما ابرد وجهها, بس تروح عندها بالعيد ممنوع ممنووووووووع تطلع من عندها قبل ما تشل عرض مصارينك , انو انفاخ , ولك معدتك بتصير بلون وهيي نازلة فيك حشي معمول على معمول , وهيي بتكون بتحكيلك بس هاي المعمولة مشاني كلها , وشو شكلهم معمولاتي ما عجبوك, فا انا برد عليها لا مش هيك بس انو شبعت لانو كل بيت عم بفوتو عم بيسلخوني معمول فا معلش مش قادر , بتروح هيي بتحكيلك لأ بس انا معمولاتي غير بدك تاكل , فا بترد عليها وبتاكل . وانا على فكرة بكره العيد من ورا قصة التلبك المعوي اللي بتصير , بس ما بحكي غير حسبي الله ونعم الوكيل .
والإشي الثاني اللي جدا ممتع وكتير FUNNY بالعيد انو انا رحت أعيد على سمير بعد ما أخلص من عندو , سمير بييجي بعيد علي , طب ليشششششششششششششش؟؟؟؟
هاد غير فرد الخرز اللي بكون بيسلخ فيك وانت ماشي ومش عارف من وين الطلقة بتيجيك .
يعني بالاخر بحكي انو العيد الناس فاهمة غلط , العيد مش هيك , العيد يعني عيد .
