الواحد كيف بيعرف حالو اذا حدا داعي عليه أو لأ؟؟ اذا ركب مع شفير تاكسي وكان هالشفير مقلع , يعني بلغة أخرى داق على طواحينو .
بتركب مع شفير تاكسي بسألك وين رايح , فا بحكيلو على الجبيهة , بيحكيلي لا والله مش بطريقي , يعني أنا مش فاهم انت وين رايح لحتى تحكيلي مش بطريقك !!! منتا شغلتك توصل الناس محل ما هم بدهم مش محل ما انت بدك !!!!
المهم لحتى الله يبعتلك شفير تاكسي ابن حلال اللي انت رح تحكي أكيد هاد هو الشفير اللي بدو ينقذني ويوصلني محل ما انا بدي , المهم بركب معو وهو بالطريق لازم يصف جنب محل قهوة , طب يا عزيزي يا شفير التاكسي العداد قاعد عم بعد , مش على 3 قروش الزيادة اللي رح ادفعها بس انو ما بيحلالك تشرب قهوة اللا وأنا معك !!! يا أخي اشرب فنجان القهوة الصبح مع مرتك .
المهم بيقعد يمشي على بيض وهو بدخن وبيشرب قهوة , طب يا عزيزي والله انا مستعجل وبدي أزور ابن اخت خال ابوي بالمستشفى وهو بين الحياة والموت بدي اروح اشوفو قبل ما يموت , بقللك والله الطريق أزمة , لأ واللي بيقهرك انو هو بيقعد يحكيلك الطريق اللي بدنا نروح منها , أنا بقوللو اسمع شارع المدينة المنورة, بقللي لأ لأ شارع المدينة أزمة خلينا نروح من صويلح , قال يعني سعادة الشفير المحترم مهتم جدا بوقتي الثمين وبدو اياني اوصل بالوقت المناسب , مع انو هو هدفو انو يزيد المسافة مشان يزيد العداد مشان ادفع اكتر .
فاهمك والله فاهمك يا شرير .
المهم واحنا بالطريق بعد ما نتفق على الطريق , بنقعد انا واياه 5 دقائق صمت (سكوت تام) يتغلغل هاد السكوت رفع صوت المذياع على محمد الوكيل , فيشد الشفير الموضوع الذي يتحدث عنه الوكيل ويتبع الشفير صارخا :ليش هيكككك؟؟؟ ما لك يا زلمة وحد الله !! يا زلمة الدنيا غلا ومش عارف شو وببلش يشكي , عزيزي انا مرتاح , الدنيا رخيصة وما في اشي غالي , فا ببلش الشفير يغمق شوي بالحكي فا انا بضطر وأقوم بالخطة الاحتياطية وبعمل حالي انو اجاني تلفون مشان اخلص من هالبلوة . المهم بعد 10 دقايق بتعجب صديقنا صبية بالشارع , وكيف انو ما بتتأثر بالبرد لانو هيي عبارة عن صوبة لأ تدفئة مركزية ما بتبرد , وبيحكيلك شوف هالفقوس هاي مزززة من الاخر , فا انا بجاريه وبحكي أه والله شلقان بتخنق , وبعدين بصير يحكيلك عن مغامراتو مع البنات وكيف انو لما ركبت معاه بنت صارت تحكيلو انت حلو كتير , خد رقمي واحكي معي مشان نطلع , وبعديها بيقلب مسلسل مكسيكي ما بيخلص , وانو أبوها صاحب أكبر شركة ألماس بالهند وكيف انو ورث هالمصاري بس هو من القرف ومن باب التسلية بيشتغل شفير تاكسي, عزيزي انا مش مهتم لقصصك هاي والله العظيم مش مهتم .
أنا مواطن عادي , مواطن بسيط , بدي أروح من مكان لمكان بدون ما أسمع هالنكد تبعك من على الصبح , يا زلمة بكفي خلص خلص خلصصصصصصص .
